రామ్ చరణ్ ఇంటర్వ్యూ.. ఎన్టీఆర్ను సైడ్ యాక్టర్ చేసేశారంటూ అభిమానుల ఆగ్రహం!
బ్లాక్బస్టర్ మూవీ ‘ఆర్ఆర్ఆర్’లో రామ్ చరణ్-జూనియర్ ఎన్టీఆర్లు ఇద్దరిదీ సరిసమానమైన పాత్ర. స్క్రీన్ టైమ్, ఎన్ని ఫైట్లు, ఎన్ని సీన్స్.. ఇలాంటి లెక్కలు వేసుకోకుండా చూస్తే ఏ ఒక్కరినీ తక్కువ అంచనా వేయలేని పాత్రలు వారివి. ఇద్దరిలో ఏ ఒక్కరు లేకున్నా ‘ఆర్ఆర్ఆర్’ పరిపూర్ణమయ్యేది కాదు. ఈ తరుణంలో ‘టాక్ ఈజీ విత్ సామ్ ఫ్రాగోసో’ షోలో రామ్ చరణ్ చేసిన వ్యాఖ్యలు వివాదాస్పదంగా మారాయి. ఇందులో తన కెరీర్, పర్సనల్ లైఫ్ విషయాలు షేర్ చేసుకున్నారు చెర్రీ. అయితే ‘ఆర్ఆర్ఆర్’ గురించి మాట్లాడే సమయంలో ఎన్టీఆర్ను సైడ్ యాక్టర్ అన్నాడంటూ ఓ క్లిప్ తెగ వైరల్ అవుతోంది. ఇది చూసిన తారక్ ఫ్యాన్స్ ఫైర్ అవుతున్నారు. తమ ఫేవరెట్ హీరోను సైడ్ యాక్టర్ అనడం ఏంటని విమర్శలు గుప్పిస్తున్నారు. నిజానికి ఇందులో హోస్ట్ తారక్ను సైడ్ యాక్టర్ అనలేదు. ఎలాంగ్సైడ్ యాక్టర్ (నీతోపాటు కలసి నటించిన నటుడు) అని చెప్పాడు. కొందరు నెటిజన్స్ కావాలనే సగం క్లిప్ను వైరల్ చేయడంతో వివాదం చెలరేగింది.
